ഉല്ലാസയാത്ര പാക്കേജുകൾക്ക് പിന്നാലെ തീർത്ഥാടന യാത്ര പാക്കേജുകൾ ആരംഭിക്കാൻ കെഎസ്ആർടിസി ഒരുങ്ങുന്നു. കെഎസ്ആർടിസി നേരത്തെ ആരംഭിച്ച് ഉല്ലാസയാത്ര പാക്കേജുകൾ വാൻ ജനപ്രിയമായി മാറിയിരുന്നു.

രാമായണ മാസത്തിലെ പ്രധാനപ്പെട്ട തീര്‍ത്ഥാടനമായ നാലമ്പല ദർശനത്തിന്  "നാലമ്പല ദർശന തീർത്ഥാടന യാത്ര - 2022" എന്ന പേരിൽ  കെഎസ്ആർടിസി വിപുലമായ സൗകര്യം ഒരുക്കിയതായി ഗതാഗത മന്ത്രി ആന്‍റണി രാജു അറിയിച്ചു.ജൂലായ് 17 മുതല്‍ ആഗസ്റ്റ്‌ 16 വരെ  എല്ലാ ജില്ലകളിൽ നിന്നും തീർത്ഥാടന യാത്ര നടത്തുന്നതിനുള്ള സൗകര്യമാണ് കെഎസ്ആർടിസി ഒരുക്കുന്നത്.

ശ്രീരാമന്‍റെയും മൂന്നു സഹോദരന്മാരായ ഭരതൻ, ലക്ഷ്മണൻ, ശത്രുഘ്നൻ എന്നിവരുടെ നാമധേയത്തിലുള്ള നാലുക്ഷേത്രങ്ങളാണ്‌ നാലമ്പലം എന്നറിയപ്പെടുന്നത്. തൃപ്രയാർ ശ്രീരാമസ്വാമി ക്ഷേത്രം, ഇരിങ്ങാലക്കുട കൂടൽമാണിക്യം ക്ഷേത്രം, തിരുമൂഴിക്കുളം ലക്ഷ്മണ ക്ഷേത്രം, പായമ്മൽ ശ്രീ ശത്രുഘ്ന ക്ഷേത്രം എന്നിവയാണ് ഈ നാലുക്ഷേത്രങ്ങൾ. ഈ ക്ഷേത്രങ്ങൾ കർക്കടകമാസത്തിൽ ഒരേ ദിവസം ദർശിയ്ക്കാൻ കഴിയുന്ന തരത്തിലാണ് കെഎസ്ആർടിസി പാക്കേജ് തയ്യാറാക്കുന്നത്.

കെ എസ് ആര്‍ ടി സി ബഡ്ജറ്റ് ടൂറിസം സെല്ലിന്‍റെ നേതൃത്വത്തില്‍ ദേവസ്വവുമായി സഹകരിച്ച് നാലമ്പല ദര്‍ശന തീർത്ഥാടന യാത്രക്കായി സംസ്ഥാനത്തെ എല്ലാ ജില്ലകളില്‍ നിന്നും തീര്‍ത്ഥാടന യാത്ര സംഘടിപ്പിക്കും. അതിരാവിലെ 3 മണിക്ക് ആരംഭിച്ച് ഉച്ച പൂജയ്ക്ക് മുന്‍പായി ദര്‍ശനം പൂര്‍ത്തിയാക്കുന്ന രീതിയിലാണ് തീര്‍ത്ഥാടന യാത്ര ക്രമീകരിച്ചിരിക്കുന്നത്. ഈ തീര്‍ത്ഥാടന യാത്രയുടെ ഭാഗമാകുന്ന യാത്രക്കാര്‍ക്ക് മുന്‍കൂട്ടി വഴിപാടുകള്‍ ബുക്ക് ചെയ്യുന്നതിനുള്ള സൗകര്യവും, ദര്‍ശനത്തിനായി പ്രത്യേക സൗകര്യവും ദേവസ്വം ക്രമീകരിച്ചിട്ടുണ്ട്. നാലമ്പല സ്പെഷ്യൽ സർവീസുകൾക്ക് പുറമെ തൃശ്ശൂർ ജില്ലയിലെ വിവിധ ഡിപ്പോകളിൽ നിന്നുള്ള പതിവ് സ്പെഷ്യൽ സർവ്വീസുകളും കെഎസ്ആർടിസി നടത്തുമെന്ന് അറിയിച്ചിട്ടുണ്ട്.

നാലമ്പല ദര്‍ശന തീർത്ഥാടന യാത്രക്ക് വേണ്ടി കെ എസ് ആര്‍ ടി സിയുടെ വിവിധ യൂണിറ്റുകളില്‍ മുന്‍കൂട്ടി സീറ്റുകള്‍ റിസര്‍വ് ചെയ്യുന്നതിനുള്ള സൗകര്യങ്ങള്‍ ഏര്‍പ്പെടുത്തിയിട്ടുണ്ട്. നാലമ്പല ദര്‍ശനത്തിന്‍റെ വിവരങ്ങള്‍ അടങ്ങിയ ഡിജിറ്റല്‍ ഗൈഡ് ബുക്കും കെ എസ് ആര്‍ ടി സി ബഡ്ജറ്റ് ടൂറിസം സെല്‍ പുറത്തിറക്കിയിട്ടുണ്ട്. മുൻ കൂട്ടി സീറ്റുകൾ ബുക്ക് ചെയ്യുന്നതിന് വേണ്ടി ജില്ല തിരിച്ചുള്ള ഫോൺ നമ്പരുകൾ അടങ്ങിയ കെ.എസ്.ആർ.ടി.സി ബഡ്ജറ്റ് ടൂർസ് നാലമ്പല ദർശന തീർത്ഥാടനയാത്ര - 2022 ഡിജിറ്റൽ ഗൈഡിനായി www.keralartc.com സന്ദർശിക്കാവുന്നതാണ് .കൂടുതൽ വിവരങ്ങൾക്ക് കെഎസ്ആർടിസി, കൺട്രോൾറൂം (24×7) മൊബൈൽ - 9447071021, ലാൻഡ്‌ലൈൻ - 0471-2463799, 18005994011 എന്ന ടോൾ ഫ്രീ നമ്പർ, സോഷ്യൽ മീഡിയ സെൽ, കെഎസ്ആർടിസി - (24×7) വാട്സാപ്പ് - 8129562972 എന്നിവയിലും ബന്ധപ്പെടാവുന്നതാണ്.